是是誰 D+ 看世界~*

請你不可看的：聖經 kap 教會 e 三十二行詩 (台語文)

教會親像所多瑪、五花十色人佇遮
亞當犯罪為夏娃、亞伯命喪佇大兄
亞伯蘭賣某為命、雅各用湯換兄名
亞倫金牛放山腳、背叛摩西是可拉

參孫愛著大利拉、掃羅追殺自己子
以利兩個愛錢子、撒母耳子亦照行
耶洗別嗆以利亞、落跑先知叫約拿
大衛愛著拔示巴、用計殺害烏利亞

法利賽人愛做大、耶穌的話無愛聽
彼得不認主的名、猶大出賣耶穌命
保羅生氣巴拿巴、無愛馬可隨伊行
聖經記載甘有影，看見你我就知影

客官若有份佇遮、請咱大家繼續聽
來台宣教師孤單、為著福音拼生命
起造學院代代湠、創設醫院救人命
設立教會來教化、向望福音開山嶺

如今教會自由行、百年歷史繼續拼
親像萬事攏得成、聖經故事可借鏡
事件一件接一件、親像連續劇在般
金錢權力我卡贏、唱著啥咪攏不驚

人人有錢買厝車、教會無錢起大廳
做董事長愛選我、議長幹部還是我
教會管錢恁祖嬤、絕對透明無相瞞
歸零運動再會啦、倍加運動告辭啦

長老嫌牧師貧段、牧師看執事流氓
若是欲知誰輸贏、開會看啥卡大聲
現代教會是安怎、予人感覺心驚驚
總是越頭一下看、才知咱攏同運命

若是講到你心聲、請你不可怪罪我
聖經記載的罪掛、你我身上無變換
快快放下咱重擔、注神耶穌才快活
上帝目啁金金看、咱的一生伊知影



後記：

有感！無感！總是反省！

最近教會 e 事件真多，我無法度用文字完全來表達！

三十二行詩，代表我 e 悔改：

做一 e 牧師，無做好 e 模範，虧欠上帝 e 榮耀！ 所以事件一件接一件！

做一 e 牧師，無做好 e 教導，虧欠信徒 e 期待！ 所以事件一件接一件！

做一 e 牧師，三十年 e 時間，影響下一 e 世代！

我問家治影響著教會啥咪？ 我想，真正有見笑！求主赦免！